ဩဂုတ် ၆ ၊ ၂၀၂၅
GG (VOM)
ကရင်ပြည်နယ် ၊သံတောင်ကြီးမြို့နယ်မှာ တောင်ကျရေကြာင့် မြေပြိုမှုဒဏ်ကိုဆိုးရွားစွာကြုံတွေ့နေရပြီး ဒေသခံ ရှစ်ယောက်သေဆုံးမှုရှိနေတဲ့အပြင် ထိခိုက်ဒဏ်ရာရသူနဲ့ ပျောက်ဆုံးသူတွေပါရှိနေတယ်လို့မြေပြင် ကူညီရေးဆောင်ရွက်နေသူဆီက သိရပါတယ်။
သေဆုံးသူတွေထဲမှာ ဥယျာဥ်ခြံမြေမှာနေထိုင်စဥ် မြေပြိုကျသဖြင့် သေဆုံးခဲ့ရသူ လေးယောက်ပါဝင်ပြီး နောက်ထပ်သေဆုံးလေးယောက်ကတော့ မြို့ပေါ်ရပ်ကွက် ( ၁) မှ မိသားစုလိုက် သေဆုံးခဲ့ရတာ ဖြစ်တယ်လို့သိရပါတယ်။
“ညကမြေပြိုမှုမှာ မိသားစုလိုက်သေဆုံးတယ် ။ကျန်လေးယောက်ကအရင်ရက်ကပါ။ ဥယျာဥ်ခြံမြေမှာပေါ့ ။အကုန်လုံးက ညအိပ်နေချိန်မြေပြိုလို့ ဖြစ်ကြတာပါ။အခုလည်းမိုးကရွာနေတယ်။ကျောက်တုံးကြီး ပြိုကျလို့ အိမ်ထိခိုက်တာရှိတယ်။အဲဒီနေရာကလူတွေ ပြောင်းရွှေ့နေကြတယ်။မြေပြိုတာမှာအိမ်ပြိုတာမှာ အပေါ်ကမြေကြီးပြိုကျလို့အိမ်ပိတာနဲ့ အောက်ကမြေပြိုလို့ ပြိုကျတာပေါ့။တောင်ကြီးအရှေ့မြောက်ဘက် မှာလည်းဖြစ်နေတယ်။သံတောင်ကြီးမြို့ရော တောင်ပေါ်ရွာတွေဘက်ရောအကုန်ဖြစ်နေတာပါ။ဒဏ်ရာရသူသုံးယောက်ရှိတယ်။ ပျောက်ဆုံးသူတွေကရှိပေမယ့် ခုကရှာရခက်ခဲနေတယ်။ ” လို့ မြေပြင်မှာကူညီရေးဆောင်ရွက်နေတဲ့ အသင်းအုပ်ဆရာတယောက် ကပြောပါတယ်။
မြေပြိုမှုက သံတောင်ကြီးမြို့ပေါ်ရပ်ကွက် အပါအဝင် တောင်ပေါ်ဒေသရှိ ကျေးရွာတွေနဲ့ ယျာဥ်ခြံမြေတွေမှာ ဖြစ်ပွားနေတာဖြစ်ကြောင်း ၊ မြေပြိုမှုကြောင့် ဥယျာဥ်ခြံဧက ထောင်နဲ့ချီပြီး ပျက်စီးမှုရှိနေသလို ရွာတွေမှာလည်း အိမ်ခြေအများအပြားထိခိုက် ပျက်စီးခြင်း၊ လမ်းတွေပျက်စီးသွားခြင်း ၊ တံတားတွေပျက်စီးခြင်းတွေ ဖြစ်ပေါ်နေတာဖြစ်တယ်လို့သိရပါတယ်။
ကျေးရွာနဲ့ သံတောင်ကြီးမြို့ပေါ်သွားရာလမ်းတွေပျက်စီးသွားသလို တောင်ငူ – သံတောင်ကြီးလမ်းမှာလည်း မြေပြိုမှုဖြစ်ပွားနေတာကြောင့် ရှင်းလင်းမှုတွေလုပ်နေကြတယ်လို့သိရပါတယ်။
မြေပြိုမှုကို ခံစားခဲ့ရတဲ့ရွာတွေနဲ့ မြို့ပေါ် ရပ်ကွက်တွေအနေနဲ့ လတ်တလောမှာ သောက်ရေပြတ်လပ်သွားပြီး မိုးရေကိုခံကာသောက်သုံးနေကြရလို့ သောက်ရေသန့်အကူအညီတွေလည်းလိုအပ်နေ တယ်လို့သိရပါတယ်။
“ရေတွင်းတူးတာတွေရှိပေမယ့်အခုက မြေပြိုတော့ ရေပြတ်လို့ မိုးရေခံသောက်နေရတယ်။တောင်ပေါ်ရွာတွေဘက်ကပိုဆိုးတာပေါ့။ သံတောင်ကြီးက လမ်းပိတ်နေလို့ ရှင်းနေကြတယ်။ရှင်းပြီးရင်တော့ မြို့ထဲဝင်လို့ရပါတယ်။ကားသွားရပြီဆိုရင်လမ်းကပေါက်ပါပြီ။နယ်မြေအခြေအနေကလည်း လာလို့ရပါတယ်။ဒါပေမယ့် လက်ရှိက အသင်းတော်တွေနဲ့ဒေသခံတွေနဲပေါင်းပြီးပဲ လုပ်နေရတယ်။အိမ်ပြိုတဲ့သူတွေက ဆွေမျိုးနဲ့ ယာယီတဲလိုမျိုးပဲ နေကြရတယ်။ ” လို့ သင်းအုပ်ဆရာက ထပ်မံပြောပါတယ်။
သံတောင်ကြီးမြို့ပေါ်မှာဆိုရင် ရပ်ကွက်ငါးခုရှိတဲ့အနက် ရပ်ကွက်လေးခုမှာ မြေပြိုမှုတွေဖြစ်ပွားနေတာဖြစ်ကြောင်း ၊ တောင်ပေါ်ဒေသဘက်မှာတော့ ကျေးရွာအများစုမှာ တောင်ကျရေကြောင့် မြေပြိုမှုတွေဖြစ်ပွားနေပြီး ကျေးရွာအချို့ကပြည်သူတွေအရှောင်နေကြရ တယ်လို့သိရပါတယ်။
လက်ရှိ မြေပြိုမှုကို ကြုံတွေ့နေရတဲ့အပြင် တောင်ပေါ်ဒေသက ကျေးရွာနေပြည်သူတွေမှာ ရွာနဲ့ သံတောင်ကြီးကိုသွားလာနိုင်တဲ့ လမ်းတွေ ပျက်စီးသွားပြီး တံတားတွေကြိုးပျက်စီးသွားတာကြောင့် လမ်းပန်းဆက်သွယ်ရေးခက်ခဲသွားတဲ့အတွက် အကူအညီတွေလိုအပ်နေတယ်လို့သိရပါတယ်။
တောင်ငူမြို့က လူမှုကူညီရေးအသင်းတွေကတော့ သံတောင်ကြီးဒေသကိုသွားရောက်ပြီး ကူညီကယ်ဆယ်ရေးတွေလုပ်နိုင်ဖို့ စီစဥ်နေကြတာတွေ့ရပါတယ်။
သံတောင်ကြီးမြို့ပေါ်နဲ့တောင်ပေါ်ရွာတွေဘက်မှာ ဩဂုတ် ၄ ရက်နေ့ကစပြီး ဩဂုတ် ၆ ရက်နေ့အထိ မိုးရွာသွန်းမှုများပြီး တောင်ကျရေစီးကာ မြေပြိုမှုဖြစ်ပွားနေတာဖြစ်တယ်လို့ သိရပါတယ်။
အရင်လ ဇူလိုင် ၂၈ ရက်နေ့တုန်းကလည်း တောင်ကျရေကြောင့် မြေပြိုမှုဖြစ်ပွားခဲ့ပြီး ဥယျာဥ်ခြံဧက ထောင်နဲ့ချီပျက်စီးခဲ့သလို လမ်းတွေပျက်စီးပြီး နေအိမ်အချို့လည်း ပျက်စီးမှုရှိခဲ့ပေမယ့် လူသေဆုံးမှုတော့မရှိခဲ့ဘူးလို့ တယ်လို့သိရပါတယ်။
ဓာတ်ပုံ – ဒေသခံ
